बालेनको राजनीतिक उभार, रवि छायामा परे?

काठमाडौँ, १२ माघ २०८२ – राष्ट्रिय स्वतन्त्र पार्टी (रास्वपा)का वरिष्ठ नेता बालेन शाहको राजनीतिक सक्रियता अहिले चरममा पुगेको छ। माघ ४ गते काठमाडौँ महानगरपालिकाबाट राजीनामा दिएर रास्वपामा पदबहाली गरेपछि, बालेनको रफ्तार कहिल्यै नरोकिने देखिन्छ।
घण्टीघरमा पदबहाली गर्ने क्रममा समर्थक र शुभेच्छुकको भीडले उनलाई ‘हाइ हाइ’ भन्दै स्वागत गरेको थियो। यसै बीच, सभापति रवि लामिछाने पनि त्यहाँ उपस्थित थिए, तर बालेनको क्रेजका अगाडि उनलाई केही छायामा परेको झल्किन्छ।
माघ ५ गते जनकपुरमा भएको कार्यक्रममा बालेन र रवि मञ्चमा सँगै देखिए। बालेनलाई भावी प्रधानमन्त्रीको उम्मेदवारका रूपमा प्रस्तुत गर्ने रास्वपाको रणनीतिले मधेसमा जनमत आकर्षित गरेको छ। कार्यक्रममा बालेनले मैथिली भाषामा दिएको सन्तुलित अभिव्यक्तिले स्थानीय मात्र नभई राष्ट्रिय स्तरमा चर्चा पाएको छ।
तर रवि लामिछाने भने मुद्दा–मामिलाका कारण सार्वजनिक सभामा समय दिन सकेनन्। पर्सा जिल्ला अदालतले उनलाई एक करोड धरौटी बुझाउन निर्देशन दिएको थियो। सर्वोच्चमा समेत केही रिट विचाराधीन रहेका कारण रवि निर्वाचन गतिविधिमा पूर्ण रूपमा देखिएका छैनन्।
बालेन आफ्नो उम्मेदवारी दर्ता गर्न पूर्वी जिल्लाहरूको दौडाहामा सक्रिय छन्। इलाम, पाँचथर, ताप्लेजुङ र संखुवासभा भ्रमणपछि उनी फेरि काठमाडौं फर्किएका छन्। पार्टीभित्र बालेनको क्रेज बढेसँगै रवि केही छायामा परे जस्तो देखिए पनि, उपसभापति डोलप्रसाद अर्यालले भने, “निर्वाचन आचारसंहिताका कारण सभामा नदेखिएका हुन्, सक्रियता भने निरन्तर छ।”
रास्वपाले यस पटक १६४ निर्वाचन क्षेत्रमा उम्मेदवारी दिएको छ। सामाजिक लोकप्रियता र जनआकर्षणलाई प्राथमिकतामा राख्दै समानुपातिक बन्दसूचीमा पनि लोकप्रिय अनुहार राखिएको छ।
राजनीतिक विश्लेषकहरूका अनुसार, बालेन–रवि दुवैको ‘लोकप्रियवाद’मा आधारित नेतृत्वले पार्टीलाई एकजुट राख्न कत्तिको सक्षम हुन्छन् भन्ने विषय अहिले व्यापक चर्चा छ।
रास्वपा अहिले आम निर्वाचनमा बहुमत जुटाउने मिशनमा केन्द्रित छ, र बालेनको उभारले पार्टीको अभियानमा नयाँ ऊर्जा थपेको छ।